விடுதலைக்குக் குறுக்குவழியிருப்பதாய்க் கதையளப்பவர்கள் குழிபறிக்கும் கைக்கூலிகளே -சேதுராசா–

வெற்று முழக்கங்களால் விடுதலை பேசி வாக்குப் பொறுக்கி உழைக்கும் தமிழ் மக்களை ஏய்த்துப் பிழைத்து வந்த போக்கிற்கு மறவழிப் போராட்டம் முற்றுப்புள்ளி வைத்ததிலிருந்து விடுதலை வேண்டிப் புரட்சிகரமாக ஈழத்தமிழர்கள், வரலாற்றொப்பு நோக்கில் தமது ஆற்றல் வளங்களிலும் மிக மிகக் கூடுதலாக உயிர்களையும் உடைமைகளையும் இழந்து ஈகங்கள் செய்து விட்டார்கள். அந்த மண்ணிலிருந்து தக்க தலைமை விடுதலைக்கு வழிகாட்ட, தமிழர் தேசம் உடலைக் கசக்கிய வியர்வையாலும் குருதி சிந்திய ஈகங்களாலும் வன்கவரப்பட்ட தனது நிலங்களை மீட்டவாறு நிகரமைத் தமிழரசு அமைத்து காலனிக்கொள்ளையர்களிடம் இழந்த தனது இறைமையை மீட்டெடுக்கத் துடியாய்த் துடித்த போது, மகாவம்சப் புனைவுப் புரட்டுகளைத் தனது கருத்தியலாகக் கொண்ட கொடுஞ் சிங்களப் பேரினவாதம் தேசிய இனங்களின் சிறைக்கூடமான தமிழரின வரலாற்றுப் பகை இந்தியாவின் நேரடிப் பங்களிப்போடும் நாயுண்ட புலால் போல உலகை மாற்றிக் கொண்டிருக்கும் உலகின் பெரும்பாலான அடக்குமுறை அரசுகளின் ஒத்துழைப்போடும் தமிழினப் படுகொலையை காட்டேறித்தனமாக நிகழ்த்தி முடித்தது.

ஒரு தேச உருவாக்கத்திற்குத் தேவையான அத்தனை கட்டமைப்புகளையும் எமது மண்ணிற்கியைந்தும் தமிழர் மரபினடி தொடர்ந்தும் உலக அறிவியல் வளர்ச்சிப் போக்கினை உள்வாங்கியும் மக்கள் நலனிற்கான பொறிமுறைகளாக தமிழின விடுதலைக்கான புரட்சிகர அமைப்புத் தலைமையேற்று அமைத்தது. தமிழீழ தேசத்தின் காப்பரண்களாக தம்முயிர் ஈந்து உறுதியுடன் போராடும் தமிழின மறவர்கள்  சிங்கள பேரினவாதிகளால் வீழ்த்தப்பட முடியாதவர்களாக நிற்பதைப் பார்த்துக்கொண்ட உலக வல்லாண்மைப் பேயரசுகள் தெற்காசியாவில் விடுதலை பெறுந்தறுவாயில் நிற்கும் ஒரு தேசிய இன விடுதலைப் போராட்டத்தை அழித்தொழிக்க அந்தத் தேசிய இனத்தை ஒடுக்கும் அரசிற்கு போர்க் கருவிகளை வாரி வழங்கி அதில் போர்ப் பொருண்மியமீட்டுவதோடு, இனவழிப்புப் போரின் பின்பான பில்லியன் கணக்கில் பணம் புழங்கும் மீள்கட்டுமாணத்தில் தமக்கான வணிக ஒப்பந்தங்களை உறுதிசெய்வதன் மூலம் ஒட்டுமொத்த இலங்கைத்தீவையும் தமது தாராளமய, தனியார்மய உலகமயமாதல் சந்தைத் தேவைக்கான புவிசார் முனையமாக்கிக் கொள்வதற்காக சிறிலங்கா போன்ற ஒடுக்குமுறை அரசிற்குக் கால் கட்டுப்போட்டு வாய்ப்புப் பார்த்தன. தேசிய இனங்களைச் சிறைப்படுத்தி வைத்திருக்கும் இந்தியாவானது தெற்காசியாவில் ஒரு தேசிய இனம் விடுதலை பெறுவதை எப்பாடுபட்டேனும் தடுக்குமென்பதோடு, தமிழீழ தேசிய இன விடுதலை என்பது தமிழ்நாடு தேசிய இனவிடுதலைக்கு விரைவூக்கியாகப் பங்களிப்பதோடு நாகலாந்து, அசாம், மணிப்பூர், மிசோரம், காசுமீர் என இந்தியாவுக்குள் இன்னமும் சிறைப்பட்டுக் கிடக்கும் விடுதலை வேண்டிப் போராடும் தேசிய இனங்களுக்கு உந்துதலாக அமைய இந்தியா துண்டு துண்டாகச் சிதறி தேசிய இனங்கள் விடுதலை பெற்று தேச அரசுகள் அமையப் போகும் வரலாற்றுப் போக்கின் மீது கொண்டுள்ள கிலியே இந்தியாவைத் தமிழினப் படுகொலையின் முதன்மைப் பங்காளியாக்கியது.

உண்மையில் படைத்துறை அடிப்படையிலும் மிகத் திறமையான திட்டமிடல்களினாலும் மக்களுக்கேயுரிய தமிழீழ அரச கட்டமைப்புகளினாலும் தமிழீழம் சிங்கள பேரினவாத ஒடுக்குமுறை அரசினால் கனவிலும் வெற்றிகொள்ளப்பட முடியாத ஒன்றாகவே மாவீரர்களின் ஈகத்தாலும் மக்களின் பங்களிப்பாலும் நிமிர்ந்து நின்றது. எனவே, தமிழீழ மக்களைக் கொன்று குவித்துத் தமிழீழ தேசத்தை அழித்தொழிக்க வல்ல தீய ஆற்றல்களைப் பெற தனது ஆற்றலுக்கு மீறி சிறிலங்கா அரசு உலகெங்கும் அலைந்து உலக வல்லாண்மையாளரிடம் ஒத்துழைப்புப் பெற்றது. தமிழர்களின் புரட்சிகரத் தலைமையையும் அதனால் காப்பாற்றப்பட்டு வந்த தமிழர்களின் தமிழீழ தேச அரசையும் அழிப்பதற்காக உலகெங்கும் ஒத்துழைப்புத் தேடி சிறிலங்கா அரசினால் போடப்பட்ட ஒப்பந்தங்களும் கொடுக்கப்பட்ட வாக்குறுதிகளும் எண்ணிலடங்காதவை. இவ்வாறாக, தமிழர்களை வகைதொகையின்றிக் கொன்று குவித்துத் தமிழர்களின் தேச அரசை அழித்தமையுடன் உண்மையில் சிறிலங்காவும் இனி மேல் மீள முடியாத பெரும் சிக்கல்களுக்கு உள்ளாகிவிட்டது. தனது இறைமையைத் தானே கூறுபோட்டு விற்றுத்தான் தனது வலுவினால் அழிக்க முடியாத தமிழீழ தேச அரசினை சிங்களம் தமிழின இனப்படுகொலைப் போரின் மூலம் அழித்தது. உண்மையில் இந்த அழிவானது, உலகிலுள்ள தேசிய இன விடுதலைக்காகப் போராடும் ஒடுக்கப்பட்ட தேசிய இனங்களுக்கு பாரிய சோர்வைத் தந்திருக்கிறது. பல தேசிய இன விடுதலைப் போராட்டங்கள் மறவழிப் போராட்டத்தின் மூலம் விடுதலையை வென்றெடுக்கலாம் என்பதில் நம்பிக்கையிழந்து இடைக்காலத் தீர்வு, உள்ளகப் பொறிமுறையில் அதிகாரப் பரவலாக்கம், பகிரப்பட்ட இறைமை போன்ற காயடிப்புச் சூழ்ச்சிகளுக்குள் மாட்டிக்கொண்டது.

இனி மறவழிப் போராட்டத்தால் எந்தப் பயனும் கிட்டாது மாறாக மீளா அழிவுதான் கிட்டும் என்ற பரப்புரையை இந்தியாவின் உளவு அமைப்பு பல தளங்களில் ஊடகங்கள் அடங்கலான தனது கருத்தியல் அடியாட்கள் மூலம் தேசிய இன விடுதலைக்காகப் போராடும் மக்களின் கட்டமைப்புகளுக்குள் ஊடுருவிச் சென்று பரப்பியது. தமிழீழ விடுதலையின் புரட்சிகர அமைப்பின் தோல்வி என்பது எக்காலத்திலும் மறவழிப் போராட்டத்தின் தோல்வியாகாது என்பதை விடுதலைக்காகப் போரிடும் ஒடுக்குண்ட தேசிய இனங்களுக்குச் சொல்ல வேண்டிய புரட்சிகரக் கடமை தவிப்பு நிலையிலும் தமிழீழ மக்களுக்கு உண்டு. இந்த அடிப்படையில், தேசிய இனங்கள் விடுதலை பெற்ற தேசங்களை தெற்காசியாவில் நிறுவத் தொடங்குவதுடன் உடைந்து சிதறப் போகும் வரலாற்று ஓட்டத்தில் இருந்து தப்பிக்கக் கிடைத்த அரிய வாய்ப்பாகவே தமிழீழ விடுதலை அமைப்பினை போரில் வென்று தமிழர்களை அழித்தமையை இந்தியா கருதியது.

நாகலாந்தின் விடுதலை அமைப்புத் தான் மற்வழிப்போரைக் கைவிட்டு பகிரப்பட்ட இறைமை போன்ற கதையளப்புச் சூழ்ச்சிக்குள் போவதற்கான காரணங்களை அடுக்குகையில் தமிழீழ விடுதலைப் புலிகள் என்ற முப்படைகளையும் கொண்ட மிக வலுவான விடுதலை இயக்கம் போரில் அழிக்கப்பட்டமையைத் தாம் கருத்தில் கொண்டும் தான் அந்த முடிவுக்குத் தாம் வருவதாகச் சொல்லி இருக்கிறது. எனவே, தமிழீழ மக்களின் விடுதலை அமைப்பு அழிக்கப்பட்டமைக்கான காரணத்தையும் அதில் முதன்மைப் பங்காற்றிய இந்தியா என்ற தேசிய இனங்களின் சிறைகூடம் பற்றிய தகுந்த தெளிவில் உலகளாவிய போராடும் மக்களுக்கும் குறிப்பாகத் தெற்காசியாவில் ஒடுக்குண்டிருக்கும் விடுதலை மறுக்கப்பட்ட தேசிய இனங்களுக்கும் இன்னும் குறிப்பாக இந்தியாவிற்குள் சிறைப்பட்டிருக்கும் தேசிய இனங்களுக்கும் சொல்ல வேண்டிய புரட்சிகரக் கடமை தமிழீழ விடுதலைக்காக மிகப்பெரிய ஈகங்களைச் செய்த தமிழீழ மக்களுக்கும் அதை முன்னெடுத்த புரட்சிகர அமைப்பின் எஞ்சியுள்ள ஆளுமைகளுக்கும் உண்டு.

ஆனால், மாறாக விடுதலைப் புலிகள் என்ற பெயரினைப் பயன்படுத்தி இந்திய உளவுத்துறை சில குறைக்கூட்டங்களிற்கு அறிவுறுத்தி தன்னை நக்கிப் பிழைப்பதே தமிழருக்குத் தீர்வு என்ற மாயையை ஊடகங்கள் வாயிலாக பரப்புகிறது. இதற்கு  விடுதலைப் புலிகள் அமைப்பில் இணைந்து களமாடிய போராளிகளைப் பல வலைகள் வீசியும் அழுத்தங்கள் கொடுத்தும் இணங்க வைக்க முயன்ற இந்திய உளவு அமைப்பிற்கு அப்படியொரு போராளியைத் தன்னும் முழுமையாக தனது நலனுக்கேற்றாற் போல மாற்ற முடியாமலோ அல்லது பிரபாகரன் என்ற அந்த விடாப்பிடிக்காரனின் அமைப்பில் அவருடன் கடைசி வரை கூட இருந்த போராளிகளை இந்திய நிகழ்ச்சி நிரலில் முழுமையாக இயங்க வைக்க முடியாது என்ற புரிதலினாலோ, பூனைகளை அழைத்துச் சூடுபோட்டுப் புலியாகக் காட்டித் தனது நலனுக்கேற்ப புலிப்பெயரில் அறிக்கைவிடக் காத்திருந்த இந்திய உளவு அமைப்பிற்கு அப்படியொரு வாய்ப்பும் கிட்டாமல் போக, கேவலம் எலிகள் இரண்டைப் பிடித்து அதுவும் சுண்டெலிகள் இரண்டைப் பிடித்து புலிகளின் பெயரில் அறிக்கை விட்டு இந்தியாவிடம் தமிழர்கள் நக்கிப் பிழைப்பதே ஒரேவழியென புலிகளின் பெயரால் இந்திய உளவு அமைப்புப் பரப்புரை செய்து வருகிறது.

தனது ஆற்றலுக்கு அப்பாற்பட்டு விற்க வேறு எதுவுமில்லாமல் விற்றுத் தள்ளிக் கொடுக்க ஏதுமில்லாமல் முடிந்தளவு வாக்குறுதிகள் கொடுத்து தனது இறைமையைக் கூறுபோட்டு விற்றுவிட்டு சாக்குழிக்குள் சென்று கொண்டிருக்கும் சிறிலங்கா தேசம் இனி எக்காலத்திலும் அமைதியாக ஓரளவேனும் தரமான வாழ்வை வாழக் கிட்டாது. சிங்கள தேச அரசே ஒரு உருக்குலைந்த அரசாக மாறித்தான் வருகிறது. உலகத்தைக் கையாளுவதாக சிறிலங்கா தேசத்தின் ஆட்சியாளர்கள் காட்டிய பம்மாத்துகள் இனிப் படியேறாது. தமிழர்களது தேச அரசை அழிக்க ஒன்றுபட்டு உழைத்த அத்தனை அரசுகளும் இன்று சிறிலங்காவிடம் தமக்கு வாக்களிக்கப்பட்ட ஒப்பந்தங்களை நிறைவேற்றுமாறு தனித்தனியாகக் கேட்கின்றனர். ஏகாதிபத்தியங்களும் அவர்களுடன் ஒத்தும் பிராந்தியத்தில் சில விடயங்களில் தனது மேலதிக்கத்தை நிலைநிறுத்தத் தனித்தும் வேலை செய்யும் இந்தியாவும் கூட சிறிலங்கா தேசத்தில் தமது நலன்களுக்காகப் புடுங்குப்படும் நிலையேயுள்ளது. எனவே இனி மேல் சிங்கள பேரினவாத ஆட்சிபீடத்திலேறி எவரும் எக்கித் தக்கியேனும் தமது பதவிக்காலத்தை முழுமை செய்ய மாட்டார்கள். கூச்சலும் குழப்பமும் சிங்கள தேசத்தின் ஆட்சியாளர்களுக்குள் நிகழத்தான் போகிறது. தமிழர்களைப் பகடைக்காயாகப் பயன்படுத்திச் சிங்கள தேசத்திற்கு மேற்குக் கொடுத்த தற்காலிக தலையிடிகளிலிருந்த தப்பிப்பதற்காகக் கூட சிங்களம் போரின் பின்பு எஞ்சிய மிச்சம் மீதியையும் விற்றுச் சுட்டு விட்டது. தமது இறைமையைத் தமது ஆட்சியாளர்கள் விற்று முடித்துத் தான் புலிகளை அழித்ததாகப் பீற்றுகின்றார்கள் என சிங்கள மக்கள் உணரும் காலம் வந்து விட்டது. இனி அன்றாடச் சிக்கல்களில் சிங்களம் முன்னெப்போதுமில்லாதளவு பாடாய்ப்படப் போகிறது. எனவே தமிழீழ தேசத்தை அழிக்கும் போதே, சிங்கள தேசமும் அழிந்து விட்டது என்ற செய்தியை சிங்கள தேசத்தில் எவரும் ஏற்க விரும்பார்கள். அதற்கு மகாவம்ச மனநிலை இடங்கொடாது. எனவே மகாவம்ச மனநிலை மண்டையோட்டு வம்சமாக போவதை இனி யாரும் தடுக்க இயலாது.

சிங்கள தேசம் தாம் எத்தகைய சிக்கலில் எவர்களால் மாட்டுண்டு கிடந்தாலும், பல கல்லெறி உடலெங்கும் வாங்கினாலும் காலை மட்டும் தூக்கும் நாய் போல, தான் எங்கடிவாங்கினாலும் தமிழர்கள் எனும் அசையா மின்கம்பத்திற்கு தனது காலைத்தூக்கிச் சிறுநீர் கழித்து வன்மம் தீர்க்கவே செய்யும். சிங்கள பௌத்த பேரினவாதத்தின் உருவாக்கமும் இருப்பும் அப்படித்தான் கட்டப்பட்டுள்ளது.

சிங்கள பேரினவாதம் எத்தகைய துன்பத்தில் துவண்டாலும் அது தமிழர்களது நிலங்களை வன்கவருவதிலும், தமிழர்களது சமூக பொருண்மிய வாழ்வியலை அழிப்பதிலும், தமிழர்கள் ஒரு தேசமாக இருப்பதைத் தடுப்பதிலும் தன்னாலியன்ற அத்தனையையும் செய்யத்தான் போகிறது. இதிலிருந்து நாம் விடுபட்டு ஒரு அடிப்படை மாந்தர்களாகவேனும் வாழ தமிழினம் தனது தேச விடுதலை நோக்கி தேக்கங்கள் சிதைத்து அடுத்த கட்டப் பாச்சலிற்கு அணியமாகியே ஆக வேண்டும். முன்னெப்பொழுதுமில்லாத அளவில் சிங்கள தேசம் தொடந்து வலுவிழந்தே போகப் போகின்றது. தமிழீழ தேச விடுதலையை முன்னெடுப்பதைத் தவிர வேறு எந்தக் குறுக்கு வழியும் தமிழருக்கு இல்லை. அப்படிக் குறுக்குவழி இருப்பதாகச் சொல்பவர்கள் இந்தியாவிற்கு நக்கிப் பிழைத்து தமிழின விடுதலையை அழிக்க அணியமாகி இருப்போராக இருப்பர் அல்லது மேற்கிற்குத் தமிழர்களைக் கூட்டிக்கொடுத்து இன்னொரு தடவை தமிழர்களைப் பகடைக்காயாக்க முனைவோராக இருப்பர்.

60 ஆண்டுகள் தமிழர்களின் அற, மற வழிப்போராட்டங்களில் விடுதலை அரசியலை முழுமையாக உள்வாங்காதவர்களுக்கு முள்ளிவாய்க்காலின் பின்பிலிருந்து இற்றை வரையான 9 இற்கும் மேற்பட்ட ஆண்டுகளில் நல்ல மீட்டல் வகுப்பினைக் காலம் கற்றுக்கொடுத்திருக்கிறது. அந்த மீட்டல் வகுப்பு அழுத்தம் திருத்தமாகச் சொல்லும் செய்தியென்னவென்றால் “விடுதலைக்குக் குறுக்குவழி என்பது இல்லை. அப்படிச் குறுக்குவழிகளெனச் சொல்லப்படுபவை எல்லாம் குழிபறிக்கும் வழிகளே”. அத்துடன் தேசிய இனங்களின் சிறைக்கூடமான இந்தியா ஒருபோதும் தெற்காசியாவில் ஒரு தேசிய இனவிடுதலைப் போரை அழிப்பதற்குப் பின்நிற்காது என்பதுடன் அது துண்டு துண்டாய் ஆகும் போகும் உலகில் பல தேசிய இனங்கள் தேச அரசுகள் அமைக்கும் என்பதுடன் எந்தப் பேயரசுகளின் தயவிலும் தங்கியிராமல் தமிழ்நாடு என்ற தேசமும் தமிழீழம் என்ற தேசமும் விடுதலை பெற விரைந்தியங்குவதொன்றே தமிழரிற்கு எஞ்சியிருக்கும் ஒரே வழி என்ற விளக்கவுரையும் கொடுக்கப்பட்டுள்ளது.

இனி தேக்கங்கள் சிதைத்து விடுதலைக்கான அடுத்த கட்டப்பாச்சலுக்காகத் தமிழர்கள் அணியமாவதைத் தவிர வேறெதையும் பேசிப் பயனில்லை. முள்ளிவாய்க்கால் என்பது தேக்கமே. அது பின்னடைவே…. தேக்கங்கள் சிதைத்தால் வரலாறு முன்னோக்கித் தான் செல்லும்….. தமிழீழ விடுதலை, தமிழ்நாடு விடுதலை என்பன தவிர்க்க முடியாத வரலாற்றுக் கட்டங்கள்……….. தொடர்ந்து போராடுவோம்….

-சேதுராசா –

2018-12-16

9,184 total views, 48 views today